Einkaskjalasöfn eða einkaskjöl nefnast þau skjöl sem ekki eru mynduð af opinberum aðilum eða öðrum sem skyldir eru að skila skjölum til opinberra skjalasafna.

Þjóðskjalasafn Íslands, héraðsskjalasöfnin og Handritadeild Landsbókasafns eru helstu skjalavörslustofnanir sem taka einkaskjalasöfn til varðveislu.

Einkaskjalasöfn eru heimildir um þjóðarsöguna og eru ekki síður mikilvægar heimildir um söguna en skjöl opinberra aðila, og geta jafnvel opnað nýja sýn á fyrri tíma sögu.

Þjóðskjalasafn Íslands tekur til varðveislu skjalasöfn einkaaðila sem eru á rafrænu formi. Nánast öll skjöl sem myndast nú til dags eru á rafrænu formi og því eðlilegt að slík skjöl séu einnig varðveitt á þann hátt til framtíðar.

Þjóðskjalasafn Íslands á og rekur vefinn „Einkaskjalasafn.is - samskrá yfir einkaskjalasöfn á Íslandi“, sem er afurð samstarfsverkefnis Þjóðskjalasafns Íslands, héraðsskjalasafna og Landsbókasafns Íslands - Háskólabókasafns. Á vefnum er nú að finna upplýsingar um rúmlega 7.000 einkaskjalasöfn sem varðveitt eru á 19 vörslustofnunum.