Fjölmenni lagði leið sína á Þjóðskjalasafn í síðustu viku þegar útgáfu sjötta og síðasta bindis í heildarútgáfu á skjölum Landsnefndarinnar fyrri 1770-1771 var fagnað á árlegum Rannsóknardegi safnsins.

Guðni Th. Jóhannesson forseti Íslands og Adam Grønholm staðgengill sendiherra Danmerkur á Íslandi tóku við fyrstu eintökunum af sjötta bindinu úr hendi Hrefnu Róbertsdóttur þjóðskjalavarðar undir lófataki viðstaddra. Ole Magnus Mølbak Andersen astoðarþjóðskjalavörður Ríkisskjalasafns Danmerkur flutti kveðju safnsins og þá flutti Anna Agnarsdóttir formaður stjórnarnefndar Þjóðskjalasafns einnig ávarp ásamt því sem Hrefna kynnti heimildarútgáfuna fyrir gestum. Kveðja var einnig flutt frá Augustinusarsjóðnum í Danmörku.

Eftir setningarathöfn voru fluttir átta fyrirlestrar sem byggðir voru á rannsóknum á skjölum Landsnefndarinnar. Erindi fluttu þau Jóhanna Þ. Guðmundsdóttir ritstjóri landsnefndarútgáfunnar, Pétur Rasmussen þýðandi, Helgi Skúli Kjartansson prófessor emeritus, Guðrún Hildur Rosenkjær sagnfræðingur og klæðskeri, Christian Folke Ax safnvörður við Þjóðminjasafn Danmerkur, Kjartan Atli Ísleifsson sagnfræðingur, Kolbeinn Sturla G. Heiðarsson sagnfræðingur og Guðmundur Jónsson prófessor.

Skjöl Landsnefndarinnar gefa einstaka innsýn inn í íslenskt samfélag á seinni hluta 18. aldar. Landsnefndin fyrri var þriggja manna nefnd á vegum konungs sem ferðaðist um Ísland í eitt og hálft ár og safnaði upplýsingum um aðstæður í samfélaginu. Í skjalasafni nefndarinnar eru bréf frá almenningi, prestum, sýslumönnum og öðrum embættismönnum auk greinargerða og margvíslegra gagna frá nefndarmönnum sjálfum. Með þessari útgáfu eru skjölin orðin mun aðgengilegri til rannsókna á sögu átjándu aldarinnar.

Verkefnið var styrkt af Rannís og Augustinusarsjóðnum danska og var unnið í samstarfi Þjóðskjalasafns Íslands, Þjóðskjalasafns Danmerkur og Sögufélags. Ritstjórar útgáfunnar eru Hrefna Róbertsdóttir og Jóhanna Þ. Guðmundsdóttir.